بن فطيس و دكتور العيون

السلام عليكم ورحمة الله وبركاته ....

مبروك عليكم الرحمه يا جماعه... أمس وأنا راجعه من الدوام و الجو كان روعه سمعت قصيدة في إذاعة الخليج وياني فضول و بحثت عنها و لقيتها و هي قصيدة قديمة لشاعر المليون في النسخة الأولى محمد بن فطيس المري...
فعلا قصيدة جميلة جداً تستحق القراءة .
قالها أثناء رحلته علاجية في مملكة البحرين عند دكتور عيون مشهور إسمه (د. مؤمن الريفي)


(يامؤمن الريفي )أنا جيتك زبون
جيتك على مدح أكثر الناس وعنيت

جيت وتعالى الله عمّا يشركون
لولاه (يامؤمن) لطبك ما اهتديت

راضي بحكم الله علي مهما يكون
عالج عيوني لو بعد طبك عميت

ودي أخاشر فالبصر من يبصرون
وأشوف دربي لا سرحت ولا ضويت

واذا قنصت أثبت مع اللي يثبتون
واشوف طيري كل ما اوميت ودعيت

يااكثر ما يضرب خويي (الطابلون)
من كثر ما أكلّته مطباّت وكليت

ودي أشوف اللي علي يعرضون
وبعض الليالي ودي أسري دون ليت

واشوف ناس ٍ فالقفا ما يرحمون
أما وقفت لصاحبي والا مشيت

من دون نظارة ولا هم يحزنون
ياكـثر ما كسّرت كشمات وشريت

لكنٌ يا دكتور جعلك ما تهون
أبغيك كلمة رأس دامك ما بديت

أسمع......ولا ابغي اللي بجنبك يسمعون
ربي كتب يكشف لك أسراري وجيت

صورة عديل الروح عندك فالعيون
وأخاف تقطعها بموسك ما وعيت

ولا عليك أمر..أطوها تحت الجفون
وعقبه لو تقطع عيوني ما شكيت

هي رأس مالي والعرب ما يدركون
أني على باب الممات و ما حكيت

ياقو قلبي يوم قفن الضعون
اللي على ذاك الموادع ما بكيت

ويا صبر صبري والعواذل يحسبون
أني دلهت من الهوى والا سليت

أسكت عساهم من سكاتي يسكتون
وانا عن اللي في ضميري ما انتهيت

وأدور الفرحة مع اللي يسهرون
أن ذكروني خذت فنجال وسريت

أخذت من وقتك يا دكتور العيون
عالج عيوني لو بعد طبك عميت

واستر علي واللي معك لا يفطنون
أنت الوحيد اللي بعد ربي دريت